लन्डनमा रक्षाबन्धनको रौनक (तस्विरहरु)

---

लन्डन । आइतबार जनैपूर्णिमा पर्व बेलायतवासी नेपालीहरुले पनि मनाएका छन् ।

साउथ इष्ट लन्डनको पशुपतिनाथ मन्दिर, अल्डरसटको शिव मन्दिरसहितका स्थानमा स्थानीय नेपालीहरुले सामूहिक रुपमा रक्षाबन्धन गरी जनैपूर्णिमा मनाएका छन् । मन्दिर नजिक नरहनेहरुले पनि परिवार र आफन्तहरुमाझ घरघरमा रक्षाबन्धन गरेका छन् ।

प्लमस्टिडको पशुपतिनाथ मन्दिरमा बिहान आठै बजेदेखि रक्षाबन्धन कार्यक्रम शुरु भएको थियो । बेलायतका लागि नेपाली राजदूत लोकदर्शन रेग्मी समेत मन्दिर पुगेर रक्षाबन्धन गरेका थिए ।

मन्दिरमा दिउँसो २ बजेसम्म रक्षाबन्धन तथा जनै वितरण गरिएको थियो । जसमा स्थानीय सयौं नेपालीले उत्साहजनक रपमा भाग लिएको मन्दिर व्यवस्थापन समितिका अध्यक्ष दासुराम पाण्डेले जानकारी दिए ।

विगतका वर्षहरुमा भन्दा पनि अझै धेरै भक्तजनहरुले रक्षाबन्धन कार्यक्रममा भाग लिएको उनले बताए ।

मन्दिरमा जनैपूर्णिमा विशेष पूजा अर्चना समेत गरिएको थियो । मन्दिरका पण्डितहरु निलहरि घिमिरे, विनोद पन्थी र आनन्द लोहनीले पूजा सञ्चालन गरेका थिए । पण्डितत्रयले उपस्थित भक्तालुहरुलाई रक्षाबनधन तथा जनै वितरण गरेका थिए ।